Projek 400 juta nya disadang tembu dalam kandang dua taun
Menteri Kereja Raya Datuk Fadillah Yusuf netapka projek ngaga jalai alun ari Sibu ke Kapit deka berengkah dipejalai ba taun 2014.
Iya madah, duit belanja RM400 juta ari perintah besai ke dibantaika Menteri Besai Datuk Seri Najib Tun Razak bedau lama tu tadi deka diatur enggau naka iya pemanah ngambika projek ulih tembu dalam timpuh dua taun.
“Ba penemuai kereja kami seraban ngagai Sarawak sehari tu, aku bisi betemu enggau Kepala Menteri Pehin Sri Abdul Taib Mahmud lalu kami duai mega bisi berandauka projek jalai Sibu ke kapit.
“Perintah besai enggau menua meri kerejasama rat ngemujurka projek tu ke alai dalam awak ke semak tu kitai deka berengkah berunding sereta nyendiaka pelin ti patut dikena dalam projek tu,”ku iya.
Projek tu sebengkah semaya perintah Barisan Nasional (BN) lalu sigi deka dikeamat ungkup pemaik rayat di Sarawak, tandu iya.
Iya mansutka jaku tu ba seiti aum pengarang berita pengudah nemuai sereta ningaka penerang senentang kereja ngemanah SMK Demak Baru di sekula nya kemari.
Najib ba penemuai ngabang gawai ke Sarawak bedau lama tu tadi ngagihka belanja RM400 juta dikena ngadu kereja tambah ngelengkas projek jalai Sibu ke Kapit.
Belanja nya nyengkaum ngaga jematan Kanowit sereta jalai di Song sepemanjai 33 Km ti tau endar nyadi penyambung ngagai Kapit.
Ba kaul bukai, Fadillah nyadang pengawa ngemanah rumah sekula SMK Demak Baru ke balat endar rusak ba sekeda endur deka begunaka belanja urung RM2.2 juta.
“Kitai beratika sekeda rumah sekula tu udah enda likun agi lalu tau ngeruga pemaik raban nembiak ke belajar ditu.
“Kitai mega deka berunding dulu enggau Opis Menteri Pelajar, ngiga jalai teulihka belanja ungkup pengawa ti patut dikereja dulu,”ku iya seraya ti enggai bejurai panjai kebuah sekula nya balat rusak.
SMK Demak Baru ke tembu digaga ba taun 2003 balat napi pengerusak merekah ba sebelah dinding, lantai sereta dinding.
