BINTULU: Tiga puluh tiga ari 41 pintu rumah panjai Indang di Labang, Sebauh urung 60 kilometer ari ditu udah angus laban api kena malam Hari Tiga tu tadi.
Nasit amat laban lapan pintu ke agi nya enda angus, pia ku Ketuai Balai Opis Pengerara Api enggau Penyah Penusah Bintulu,Dihata Gobel.
Lima iku raban pengerara api berumban ngagai palan penusah nyadi betuaika Hambali Mohamad ngena kerita 4×4 WD pengudah nerima kangau urung pukul 9.21malam.
Ketegal rumah panjai nya kelalu jauh, iya madahka raban pengerara api bisi meraka sungai ngujungka sida datai ba palan penusah nya pukul 12.15 pagi.
Lebuh sida datai ba endur nya, rumah panjai 33 pintu nya udah retung abis diempa api.
Ku Dihata, nadai diripot bisi orang bakal ba penusah nya lalu api ti nganguka rumah panjai nya dipechaya bepun ari dapur sepintu rumah panjai nya.
Operasyen tembu urung pukul 3 pagi pengudah raban pengerara api mujur madamka api.
Penyampau peranak rumah panjai ti tasah ketegal penusah nya bedau ulih ditentuka.
