SARATOK: Bakal ti balat ba dada ngujungka seiku sekuriti ke gawa ba sebengkah opis perintah semak ditu, bebadi nyawa lemai kemari, kes tu diengkah ari baruh kes munuh diri naka ke diatu.
Ketuai Polis Pelilih (KDP) Saratok, DSP Lee Thai Lein madah, niang Rekie Empading, 58, dipelaba nimbak diri empu ngena senapang patah bansa Made in USA 12GA Choke ba rumah iya di Taman Seroja Indah, Saratok.
“Penusah tu nyadi urung pukul 1.30 lemai. Lebuh penusah nyadi, niang enggau dua iku anak iya sereta dua iku da agi kaling anak iya benung tinduk ba bilik besai rumah nya pengudah mulaika diri ari ngulu pengerami melah pinang ba sebuah rumah panjai di Ulu Krian Saratok.
“Bepelasarka pansik tumu penusah tu, niang tama ke dalam rumah sereta ngagai bilik iya lalu ngambi senapang patah lalu terus nimbak diri empu ba dada ngujungka iya bebadi nyawa.
“Dalam penerang tumu ari sida ke diau besemak sereta kaban belayan niang, kebuah iya nimbak diri bedau ulih ditemu,” ku iya dalam sebengkah penerang berita, kemari.
Kenu ku Lee, nadai sebarang laya tauka petalat nyadi ba niang enggau sida sebilik sebedau penusah nya nyadi.
Tambah mega ku iya, sebedau penusah nyadi nuang bekereja syif malam ari pukul 8 malam kena 14 Oktober (Hari Lima) nyentuk 8 pagi, 15 Oktober (Hari Enam).
“Ku sida sebilik, pengudah tembu gawa, niang nadai mulaika diri ke rumah nyentuk penusah nya nyadi.
“Senapang ke dikena niang nimbak diri udah dirampas dikena bejalaika pansik enggau silik.
“Berebak enggau nya, bangkai niang udah dianjung ngagai rumah bangkai Sepital Saratok ngambika dikena nasat enggau silik,” ku iya seraya ngelansa kes tu benung dipansik piak polis.
