BINTANGOR: Seraban pekereja peranak Indonesia berasai chukup tekenyit lebuh tepedaka seiku jelu ti nyelai sereta jarang dipeda baka deka nyerang sida maya benung gawa ba sebengkah kebun sawit dandang besai di Jalai Bintangor/Sibu, lemai kemari.
Nitihka penerang seiku ari sida, jelu nya datai ngenyit ngelawa bala sida ke benung kiruh gawa.
Ku iya, jelu nya datai ngenyit lalu baka ke deka nyerang sida.
“Meda baka nya, seiku ari kami lalu beguai malu jelu nya sampai luput,” pia ku iya madah ngagai pengarang berita, kemari.
Iya madah, udah ngeleda sida muru jelu nya tama ngagai kampung baru.
Ku iya, nya keterubah bala sida meda jelu nya lalu enda nemu nama bansa jelu nya.
Bisi mega sekeda ari orang ke gawa ba kebun sawit dandang besai nya madah jelu nya nyangka jelu jugam ti udah kelalu tuai nyentuk nadai agi bulu baka ke dipeda sida.