PAKAN: Nyuaka semua raban bansa Dayak penyukung tegap Barisan Nasional (BN),ku Menteri Besai (PM) Datuk Seri Mohd Najib Tun Abdul Razak.
Nengah sukung penuh raban bansa Dayak ba pengawa bepilih besai tu tadi kelebih agi di menua pesisir, BN ulih megai perintah besai baru.
“Kededua Parti Demokratik Progresif Sarawak (SPDP) enggau Parti Rakyat Sarawak (PRS) udah menang ba semua sitak parti nya maya pengawa bepilih besai tu tadi.
“Kena malas nya, kami deka ngemeratka agi agenda pemansang di menua pesisir kelebih agi ungkup raban bansa Dayak di nengeri tu laban udah nyukung BN.
“Aku ngenukuka, sebarang pengurang tauka penanggul deka diputarka kami (perintah).BN ukai semina bejaku aja, tang mega enda ngemulaka semaya.
“Aku sedia berundingka semua peminta kita kelebih agi raban bansa Dayak ke diau di menua pesisir,” ku iya bejaku ba mua lebih 6,000 iku temuai ke ngulu pengerami Ngelalu Pengabang Gawai Dayak ke diatur ba Rumah George Chunggot, Nanga Nansang ditu,lemai kemari.
Iya disempulang bini iya Datin Seri Rosmah Mansor, Menteri Pemansang Rama ke mega Kaban Parlimen Saratok Tan Sri William Mawan Ikom sereta bini iya Puan Sri Julia Mawan, Menteri Pengatur Pemansang Pengeraja Asal Kedua Datuk Amar Awang Tengah Ali Hasan ti ngarika Kepala Menteri Pehin Sri Abdul Taib Mahmud, Menteri Muda Perengkaguna Mensia Mayuh (Karan enggau Penyambung) Datuk Dr Stephen Rundi Utom, bala Kaban Parlimen ke bukai sereta Tuai Rumah George.
Najib mega muji raban bansa Dayak ke seruran berdiri tegap ba belakang BN sereta enda mudah tekuing runding ningaka petenah enggau semaya penyakal.
“Ulah ke baka nya meh dikerinduka kami laban ketegal nya perintah BN ulih neruska agenda pemansang seraya kitai sama nuju jalai pengidup moden agi sereta juluk 2020,” ku iya.
Iya mega madahka perintah BN deka majak mantu rayat sereta mutarka penanggul rayat bepelasarka ari segi bekunsika bantu rayat ungkup rayat di menua tu.
“Enti nadai penanggul, kami mantu. Kami deka mantu bepelasar besaumka bajet, agih belanja enggau mayuh macham agi ungkup rayat di menua tu. Enti ampit mimit sama bela mimit, mayuh sama bela penyampau.
“Awakka semua rayat ti amat begunaka bantu nya ngasaika semua bansa bantu ke diberi perintah BN, laban kami ngemeratka pengingin enggau peneka ati rayat,” ku iya.
Najib mega mantaika pengaga ati iya ba pemujur BN di nengeri tu maya pengawa bepilih tu tadi kelebih agi ngagai chalun BN ba sitak menua pesisir.
“Terima kasih ngagai raban Dayak kelebih agi di nengeri tu laban arapka BN merintah menua tu baru.
“BN mengkang bekuasa sereta arapka kuasa nya dikena kami memanah lalu nguntungka rayat di menua tu,” ku iya.
