PAKAN: Perintah Barisan Nasional (BN) deka nimbal pemanah rayat raban bansa Dayak berindik ari penampak sukung ti tegap ngagai perintah BN maya pengawa bepilih besai tu tadi.
Menteri Besai Datuk Seri Najib Tun Razak madah, sukung ari raban bansa nya mandangka sida pechayaka program pemansang perintah lebih manah ari juluk raban parti penyakal.
“Sukung tu meri kitai (perintah) pengering bejadika pelin transformasyen menua tu mansang ngelawa taun 2020.
“Nya alai, sukung tu mandangka rayat raban bansa Dayak endang nyadi penyukung ti kuat ngeringka perintah BN,” pia ku iya madah.
Najib mantaika jaku tu maya iya ngabang Gawai Dayak ngagai rumah panjai Kaban Parlimen Saratok Tan Sri William Mawan Ikom ba Rumah George Chunggot di Nanga Nansang, Pakan ditu lemai kemari.
Bela bisi datai maya tu iya nya bini iya Datin Seri Rosmah Mansor, Menteri Pemansang Rama ti mega Kaban Parlimen Saratok Tan Sri William Mawan Ikom enggau bini Puan Sri Julia Mawan, Menteri Pengatur Pengeraja Asal enggau Rampa Menua II Datuk Amar Awang Tengah Ali Hasan ngarika Kepala Menteri Pehin Sri Abdul Taib Mahmud, Menteri Muda Perengka Guna Mayuh (kuasa letrik enggau penyambung) Datuk Dr Stephen Rundi Utom enggau TR George sereta bala pengabang ke bukai.
Nampung jaku iya baru ku iya, ketegal nya, perintah naka alah bejadika progrem pemansang lebih agi ba kandang menua pesisir di nengeri tu ngambika tiap bengkah pelilih menua enda tinggal ari pemansang baka perengka guna mensia mayuh.
“Aku ukai mantaika danji puang tang bedanji naka alah bejadika progrem pemansang ba menua pesisir di Sarawak laban kitai BN endang mendingka penyuntuk enggau sebana rayat,” ku iya madah.
Najib madahka pekara tu mega ketegal perintah BN bekenaka ulah bekunsika penyenang enggau pemerinsa enggau rayat baikka ba tikas perintah besai tauka perintah nengeri.
“Kitai ba tikas perintah besai enggau perintah nengeri ukai semina bekunsika kuasa megai menua tu tang bekunsika nama pekara ke nyadi baikka pekara senang tauka tusah ba serata menua tu.
“Tu meh pengelebih kitai BN. Kitai lebih agi ngemeratka rayat enggau pemansang menua,” pia ku iya madahka baru.
Tang pekara tu ku iya madah, bebida enggau tuju raban penyakal.
“Aku pechaya, penyakal enda ulih ngaga pekara baka tu laban ba runding sida, sida semina deka nyadi ketuai, deka nyadi Menteri Besai aja tang ngelengka pekara penguntung enggi rayat.
“Tu ukai chara kitai, tang kitai BN ngembuan penemu ti nejuka diri enda ulih dulu ari pekara ke bendar tang pechaya nama pekara ke endang segi nyadi. Ukai semina bemimpi aja,” ku iya madah enggau lenak.
Berebak enggau tu mega, Najib madahka iya berasai temegah ati ngagai raban bansa Dayak di nengeri tu laban enda muntang diachuk raban penyakal ngambika ngenggaika perintah BN.
“Ketegal tu meh, kami bedanji enggau naka alah sereta disempulang enggau pengeliat ati bekena kuasa megai menua tu enggau manah ngambika tepulaika penguntung ngagai semua rayat di menua tu,” pia ku iya.
